Pahayag ng Boto

Rep. Lorenzo R. Tañada III

4^th District, Quezon

Mr. Speaker, bilang kasapi ng House Majority, ako po ay tuloy-tuloy na nanindigan para sa prinsipyo at katotohanan higit sa personalidad at pampulitikang partido. Naniniwala ako na ang proseso ng impeachment ay hindi kagyat na paghuhusga ninuman bagkus, ito ay maaari rin gamitin upang patunayan na walang ginawang kasalanan ang pangulo.

Mr. Speaker,

Ayon sa mayorya, malamig na bangkay na raw ang impeachment complaint nang dumating ito dito sa Kongreso. At hindi kailanman daw ito pinatay ng House Committee on Justice.

Sa puntong ito, tama ang mayorya.

Sapagkat noon pa mang hindi pa nabubuo ang second impeachment complaint, nagbabala na ang mga lider ng mayorya na hindi nila patatagalin ang pagproseso sa impeachment complaints tulad nang nangyari noong nakaraang taon.

Sa katunayan, ilang araw lamang ang ibinigay ng nasabing mayorya para sa buong proseso ng impeachment. Last rites, ika nga na lamang ang kanilang iginawad para sa itinuring nilang cadaver.

Ang impeachment daw ay labanan ng numero. Hindi ito kailanman naging labanan ng tama o mali. At higit sa lahat, hindi ito labanan ng prinsipyo.

Mr. Speaker,

Kaya naman hindi ito usapin ng sufficiency in form and substance tulad ng ipinangangalandakan ng maiingay at nagmamarunong sa mayorya ng Kongreso.

Sadya nga bang dulot ng kapalpakan ng minorya ang pagkamatay ng impeachment? O talaga lamang laro ito ng nakararaming bulag na tagasunod ng pangulo?

Mr. Speaker,

Kahit pa sapat ang porma at hitik sa sangkap ang sustansya ng complaint, there could never, never, never be a meaningful discussion on the issues being brought before in this August Body. Dahil sabi nga nila, this is a numbers game.

At kahit sa gitna ng kaliwa’t kanang naghuhumiyaw na akusasyon sa ating pangulo—mga akusasyon ng pandaraya, karahasan at korupsyon, ang sagot lamang dito ng kongreso, it is really a numbers game . . .

Tatlong isyu ang sana’y magandang talakayin at dapat sana’y sagutin na ng pangulo … once and for all.

massive election fraud, fertilizer scam at gross human rights violations.

Ngunit, kahit pa sa gitna ng pag-amin sa kamalian at buong Pilipinas ang nakasaksi sa kanyang . . . “I’m sorry . . .”

Kahit pa sa pagkakahuli sa Amerika ni Joc Joc Bolante na sangkot sa fertilizer scam at paghingi niya ng asylum,

Kahit pa sa tumitinding pandarahas labanm sa mga kritiko ng administrasyon,

Ano nga ba ang katotohanang sa likod nito? Ano ba talaga ang tutoo? The Filipino people should know! They have all the right to know!

Pero kahit hindi man nila aminin ito, ang tiyak ay sinayang ng administrasyong Arroyo ang pagkakataon na lubusang sagutin ang mga ibinibintang sa kanya at tuluyang linisin ang kanyang pangalan.

Mr. Speaker,

Hangga’t nasa balangkas ang kongresong ito na kami ay pro-impeachment at kayo naman ay anti-impeachment …

Hangga’t ang usapin ay umiinog sa grasya na nagmumula sa bulag na paniniwala sa pangulo …

Hangga’t nasa balangkas ang adminitrasyong ito na durugin, sa kahit papaanong paraan ang impeachment …

Wala na talagang maaaring asahang katotohanan ang mamamayan sa Kongresong ito. Bagama’t nakakadismaya, ito ang katotohanan sa loob ng tinaguriang August Chamber.

Mr. Speaker, sayang at ito ang iiwan na legacy ng mayorya ng kongresong ito.

Ang tanong ng taumbayan ngayon ay: nasagot na ba ang mga paratang sa ating pangulo? Nahanap na ba talaga natin ang katotohanan para tumahimik ng mamamayan at maaari na tayong mag-“move on” ayon sa ating pangulo.

One thing for sure . . . ang mga ginagawa ngayon ng so-called majority ni Arroyo ay naggagarantiya na mananatili sa kaisipan ng taumbayan at maitatala sa kasaysayan na MAY INIIWASAN, MAY PINAGTATAKPAN at MAY ITINATAGO sa taumbayan ang gobyernong ito.

Mr. Speaker, I vote NO to the Committee Report