PRESS RELEASE

26 April 2005

MGA KONGRESISTA NG QUEZON,

NILINAW ANG MGA BATAYAN SA PAGBUBUO NG ISA PANG LALAWIGAN

Buong pagkakaisang ipinahayag ng apat na pangunahing may-akda ng House Bill 2862- Tanada, Nantes, Alcala at Suarez na ang pagbuo ng bagong probinsya mula sa ika-3 at ika-4 na distrito ng Quezon ay matagal ng dapat naihain.

“Sana man lamang ay mas matibay na argumento at hindi madamdaming mga dahilan kagaya ng paggamit sa patuloy na pagtaas ng presyo ng mga bilihin ang ibinibigay nila sa pagtutol sa panukalang batas,” ayon kay Rep. Alcala ng 2^nd Dsitrict.

“Karaniwang binubuo ng dalawampung (20) munisipalidad ang isang probinsya. Ang Quezon ay mayroong apatnapu (40) munisipalidad at isang lunsod. Itinuturing itong pinakamahabang lalawigan sa ating bansa. Ilan sa mga munisipalidad nito ay nasa isla at mayroon din namang malalayo sa aplaya. May nasa matataas na lupa na halos bulubundukin na. Sa tutoo lang, hindi sasapat ang isang linggo upang libutin ang buong probinsya,” paglalarawan ni Suarez ng ika-3 distrito.

“Kahit pa gaano katapat at kahusay na tagapamahala ang isang gobernador, mahihirapan siyang pangasiwaan ang malaking probinsiya ng Quezon na may magkakaibang munisipalidad. Kapag nabuo na ang isa pang probinsya at makapagpuwesto tayo ng mga tamang insentibo, papasok rin ang mga negosyo sa ika-3 at ika-4 na distrito,” ani ni Nantes ng unang distrito.

“Huwag natin isipin na ang hakbang na ito ay mapanghati. Ang makita ang pag-unlad ng buong probinsya ay isang malaking dahilan upang tayo ay magkaisa. Hindi maiaalis na tayo’y tunay pa ring mamamayan ng Quezon. Sa ganitong kaayusan, mas nailalapit natin ang pamahalaan sa mamamayan at may madulas na pamamaraan ang mamamayan upang ating singilin ang kanilang pananagutan. Ito ang tunay na diwa ng pag-unlad. Ito ang hangarin ng panukalang batas na ito,” diin ni Tanada, kinatawan ng ika-4 na distrito ng Quezon.